2Ti 3 | MCQ | STEP | A ikaho hami he'amana. Vea túchamaijaho niho'o vea kisima'ura rehuna.

2 Timothy 3

Vea Túchamaijina

1 A ikaho hami he'amana. Vea túchamaijaho niho'o vea kisima'ura rehuna. 2 'Enareje emaa pupusumaru oja ma'arahuna 'ee moniaru oja mihuna 'ee kehi kehi ohune 'ee jarika rene 'ee Godina'i ira sisea 'wahune 'ee emahwa puni ira pahene veji'ina rehuna 'ee patemarasahi'ina rehune 'ee ea paakumahi'ina'e rehuna. 3 'Ene oja pama'aravi'ina'e rene 'ee pavwihana arekaravi'ina'e rene 'ee ea 'ahopuni vu'a sisearu kosaravi'ina rene 'ee opuipo pa'ajoaravi'ina rene 'ee ea panumiravi'ina rene 'ee mamaijija niho'o senavi'ina'e rehuna. 4 'Ene hekajihe 'waravi'ina rene 'ee majikari hiji'ina rene 'ee pu pusumano vwihaji'ina rene 'ee niho'o temarasahuniji oja mi'i kaivo Godiho oja pamahuna. 5 'Ene pura 'unama ka'ene ve'avajaho a kime Godi heji'ina rohuna kaivo ijí harura ka'ene venae arira'e rehunijaho pataarohuna. 'Enakúne ea ija'inijija juha'avara. 6 Ijihuni maijaho ijí puni vaja kajino ea 'aho'a ani ani'ina itunavi'inijipo venau'e va'e ea 'ahopuni sei va'ajime napara harura pa'ana ka'ene puni siseapo hivahivu'e hiju jihipuni va'ura. 7 'Ene ea ijákajija 'unama sisea hena kahuna'e ura renau jihuna'e pu roe 'unama nimaiji hena kahuna areri pana. 8 'Ene ea ikakajipo 'unama ka'ene nimaijija ninamaura areri Jenisi'o Jemipirisi'o Mosisi ninava ja'ina'e vejura. Ijihuni maijaho puni vwihaijija sakarasahara 'ee nimaaroijara 'waramujaho pu pataarorahara. 9 'Enakaivo pu majama pavena vahuna. Ijihuni maijaho 'unama sisea ka'ene pura vejujija samaa'e reje piunihuna. Areri ea no'ohe'i kajihi piuniva ja'ina'e rehuna.

Túchamaa 'Unama Ichá'ina Vehunijina

10 'Enakaivo nara a najahuta 'ee nuni kara nikamune 'ee nuni ura 'ee nuni nimaaroa 'ee nara ea 'aho'a vwihaniura 'ee ea oja mihura 'ee masuani kirane hijura ka'ene najahuji a 'ararihie venana. 11 Nara haha hiana ka'ene Enitioki 'ee Aikoniami 'ee Risitara apejujija a nihena kimana. Ijí haha hiana iraka ka'ene nara apejuta vajijaho Natohwijara na vahanimana. 12 'Enajihuna'e ea Jesu Keriso oni vajijino hia arira'e hihuna'e ura re'amajaho nimaa'e ea pu sise'i 'ahihuna. 13 'Enakaivo ea sisesa 'ee ea pisivi'ina kajija hine ea pisiviujaho roe siseranuna'omo niho'o siserana parahuna. 'Ene pisivisavujara pu 'u'o pisimisama parahuna. 14 'Enakaivo a uneunecha ka'ene najahume henajihija'e veji'i hine 'ee ijija nimai jihuna'e ea irahuna'i a hena kamajaho a nihenu. 15 'Ene a mai'o sesamu'uru rene Godoni Ira ka'ene akuavi'inijaho najahara'omo ijara vwiha mamaa vaja'eme a Jesu Keriso oni vajijino nimaa ronarena ni'ajahi'ina apenana. 16 Godoni Irakaho maho'o Godoni ira uhoi renajihuna'e mamaa'omo ea najahune 'ee ea ni'ajihe ira kisina uranahune 'ee ijara ni'ajúhe 'ekue 'unama ariri irechamúhune 'ee ijara 'unama aririjaho najuhuna. 17 'Eje Godoni ehija amairiarama areri rena'e kaukara mamaa ka'ene Godira ura renujaho areri vehuna.